∫ Synopsis: April A.H. Drexel is the curator of an art exhibit named, “a” mini retort. This exhibit encourages the viewer to think critically about “how/when/why/where creative textualities can simultaneously contribute, complicate, and perhaps, distort understanding.” “a” mini retort runs through
∫ Synopsis: April A.H. Drexel is the curator of an art exhibit named, “a” mini retort. This exhibit encourages the viewer to think critically about “how/when/why/where creative textualities can simultaneously contribute, complicate, and perhaps, distort understanding.” “a” mini retort runs through June 1 at Mark’s Garage in Honolulu.
Welina e nä hoa puni mea hou o ka ‘äina. E kala loa paha i ho‘opuka ai ka Luna Maka‘äinana Faye Hanohano i kona makemake i nä hana no‘eau i hana ‘ia e ke Kanaka Maoli. Kohu mea lä, käka‘ikahi nä hana no‘eau a ke Kanaka Maoli ma ka hö‘ike‘ike a ke aupuni moku‘äina i kapa ‘ia ‘o ka Hana No‘eau ma nä Wahi i Hämama ‘ia i ka Lehulehu. Akä, ua pömaika‘i nö paha ke aupuni moku‘äina a me nä känaka puni i nä hana no‘eau a ke Kanaka Maoli.
‘O “he” pane iki, he hö‘ike‘ike hana no‘eau ia e mälama ‘ia nei i këia manawa ma ka Hale Ka‘a O Maleka ma ke kaona. A he nui nö nä Känaka Maoli i hana i hana no‘eau no ia hö‘ike‘ike, ‘o Maile Andrade, ‘o Kaili Chun, ‘o Kauka de Silva, ‘o Noelle Kahanu, ‘o Imaikalani Kalahele, ‘o Kapulani Landgraf, ‘o Abigail Romanchak, ‘o Maika‘i Tubbs, ‘o Kunäne Wooton, a ‘o April A.H. Drexel. ‘O Drexel ke kahu o nei hö‘ike‘ike hana no‘eau ho‘oulu mana‘o. He hö‘ike‘ike ia kahi e no‘ono‘o loa ai a e piolo ai paha käkou i nä hana a nä känaka näna i hana i ia mau hana no‘eau a me nä hana no‘eau i waho o ia hö‘ike‘ike nö ho‘i. A ke mana‘o nei ko ‘oukou mea käkau, he mea ho‘i ia hö‘ike‘ike e no‘ono‘o ai käkou i kä käkou hana pono‘ï ma nä ala a käkou e hele nei a e hele ai ho‘i ma këia hope aku.
Ua hele nö ko ‘oukou mea käkau i ka Hale Ka‘a O Maleka e mäka‘ika‘i ai i këlä Pö‘aono aku nei. A aia nö ke kahu o “he” pane iki ma laila. A he keu ia a ka maika‘i, no ka mea, ua wehewehe maila ‘o ia i nä mea like ‘ole e pili ana i nä hana no‘eau i laila. He mea minamina ka lawa ‘ole o këia kolamu nei e kama‘ilio ‘ia ai nä hana no‘eau a pau o laila. A no laila, e kama‘ilio ‘ia kekahi.
‘O ka mea mua, ‘o ka hana no‘eau nö ia a ke kahu hö‘ike‘ike, a Drexel, i hana ai, i kapa ‘ia ‘o …for the record… He ho‘opilipili ‘ölelo kä Drexel, ‘oiai, ua hana ‘ia nä ki‘i ma luna o ke pä leo, a he ‘ano ho‘opa‘a mana‘o a ho‘opa‘a mo‘olelo paha kona makemake, i ‘ole ho‘i e nalo nä leo o nä känaka o Honouliuli, ‘Ewa, O‘ahu.
A ‘o ka lua o ka hana no‘eau e kama‘ilio ‘ia, ua kapa ‘ia ‘o Café ‘Ole, na Noelle M.K.Y. Kahanu i hana. A ‘o ke kumu a ko ‘oukou mea käkau i makemake ai e kama‘ilio no këia hana no‘eau a Kahanu, ua kuhihewa ko ‘oukou mea käkau, he hale ‘aina li‘ili‘i ‘i‘o ia ma loko o ia kü‘ono o ka Hale Ka‘a O Maleka. Ua kükulu ‘ia kekahi mau noho ‘ehä a me kekahi mau päkaukau ‘elua, a he papa kuhikuhi mea inu nö ho‘i ko nä päkaukau, ‘o ia paha ka mea i kuhi ai ko ‘oukou mea käkau, he hale ‘aina ‘i‘o ia. Na kekahi i ho‘omaopopo mai ë, ‘o ia kekahi o nä hana no‘eau. Ua ‘ölelo ‘ia, ua hana ‘ia e Kahanu, i pane i ka hana Ho‘ohawai‘i i nä mea a pau, ‘o ka mea ho‘ohiluhilu kula ‘oe, ‘o ka lole ‘oe, ‘o ka lama pa‘ipa‘i ‘oe, a pëlä aku.
‘O nä hana no‘eau a pau i laila, ua hana maiau ‘ia, me ka no‘ono‘o nui ‘ana a pono nö ho‘i. A ‘a‘ole ia he mau mea wale nö e nani ai ka lumi. He mea nö ho‘i ia e ulu ai ka mana‘o, ka no‘ono‘o, ka piolo ‘ana ho‘i i ka hana a käkou.
A no laila, e naue aku ‘oukou i ka Hale Ka‘a O Maleka (Mark’s Garage) i ka hola 12:00 a ka hola 5:00 o ke ahiahi mai ka Pö‘alua a i ka Pö‘aono a hiki i ka lä mua o Iune no ka mäka‘ika‘i ‘ana iä “he” pane iki.
• E ho‘ouna ‘ia mai nä leka iä mäua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei: kwong@hawaii.edu, rsolis@hawaii.edu
