Synopsis: Instead of sending $17.9 million a year outside of Hawai‘i to improve revenue from the Hawai‘i Convention Center, use the money here in Hawai‘i. Ua kükala ‘ia aku nei, he hui hou näna e ho‘okele i ka Hale Mälama
Synopsis: Instead of sending $17.9 million a year outside of Hawai‘i to improve revenue from the Hawai‘i Convention Center, use the money here in Hawai‘i.
Ua kükala ‘ia aku nei, he hui hou näna e ho‘okele i ka Hale Mälama ‘Aha ma Waikïkï, ‘o AEG Facilities, ke hiki aku i ka lä mua o Ianuali o ka makahiki hou, 2014, ‘o ia ka wä e ho‘omaka ai ua hui lä i ka lawelawe ‘ana i ka hana e pono ai, a he ‘elima makahiki ka lö’ihi o ka palapala ‘aelike.
‘O SMG Hawai‘i ka hui näna e ho‘okele nei i ka Hale Mälama ‘Aha a mai ka makahiki 1998 ka ho‘okele ‘ana, akä, e hiki koke ana ka hopena o kona palapala ‘aelike i ka hopena o këia makahiki. ‘A‘ole i ho‘omau ‘ia ka hana a SMG Hawai‘i no ka mea, ‘a‘ole i nui ka loa‘a. Ua mana‘o ‘ia, i ka hiki ‘ana i ka makahiki 2008, ‘o ke kälä malihini mäka‘ika‘i i loa‘a mai ka Hale Mälama ‘Aha, he $1.9 biliona. ‘A‘ole na‘e pëlä. A he $1.9 biliona kälä, he pu‘u nui loa ia e pono ai ko Hawai‘i. ‘O ka mea ‘äpiki, ‘o ka nui o ke kälä malihini mäka‘ika‘i i loa‘a ‘i‘o mai ka Hale Mälama ‘Aha, he $526 miliona o ka makahiki no nä makahiki he 10. He hapahä ia a ‘oi iki aku, akä, he pu‘u nui nö ho‘i ia.
‘O ka nui o ke kälä i lilo aku iä SMG Hawai‘i i këlä me këia makahiki o ka palapala ‘aelike, he 14 miliona a ‘oi aku a emi mai paha o ka makahiki. A ‘o AEG Facilities, e lilo aku ana he $17.9 miliona i ua hui lä i ka makahiki mua o ka palapala ‘aelike. ‘A‘ole i möakäka ka nui o ke kälä ma ia hope aku, akä, he $17.9 miliona kälä o ka makahiki mua. A e lilo ana ia pu‘u kälä i ka hui ma ka ‘äina ‘ë. ‘Eä, e aho ka ho‘okumu ‘ia ‘ana aku o nä külana hana külanakauhale a moku‘äina paha a he ke‘ena paha nona ia kuleana, ‘o ia ho‘i, ka ho‘omähuahua ‘ana i ka nui o ka loa‘a mai ka Hale Mälama ‘Aha mai. A laila, e lilo ana ka nui o ke kälä i ko Hawai‘i.
Inä pëlä, he hiki paha ke hana pü ia ke‘ena aupuni me nä haumäna o nä kula aupuni o Hawai‘i no ka ‘imi ‘ana i wahi e kö ai ka makemake no ka Hale Mälama ‘Aha, a inä koho ‘ia ka mana‘o o ka haumäna, e lilo kahi pu‘u kälä nui i kona kula no ka ho‘omaika‘i ‘ana i ke kahua a no ke kü‘ai ‘ana paha i nä pono. ‘O ka mea nui, e lilo ana ka nui o ke kälä no ka pono o ko Hawai‘i.
Ua ‘ölelo ‘o AEG Facilities, e mälama ‘ia ana nä limahana he 70 a ‘oi aku a emi mai paha o SMG Hawai‘i, a no laila, e pa‘a ana kahi mähele o ia pu‘u kälä ($17.9 miliona) ma Hawai‘i nei, akä, he mähele li‘ili‘i wale nö ia. Inä he ke‘ena ko ke aupuni Hawai‘i nona ke kuleana, a lilo ia pu‘u kälä iä ia, ‘o ka hapanui o ke kälä, ma Hawai‘i nei nö e lü ‘ia ai.
A maika‘i paha ke uku ‘ia ka hele kula nui ‘ana o kekahi mau haumäna no ke a‘o ‘ana i ka hana e pono ai a laila, e hai ‘ia ma hope o ka puka ‘ana mai ke kulanui mai. E hana pü paha ia ke‘ena aupuni me ke Ke‘ena ‘Oihana ‘o Shidler o ke Kulanui o Hawai‘i ma Mänoa.
‘Eä, he nui nä ala e ho‘omaika‘i a e ho‘opömaika‘i ai i ko Hawai‘i, akä, he pono ka nänä ‘ana i ko Hawai‘i o loa‘a like auane‘i ka ‘ulu a Kamaiopili iä käkou. A e hoka ana ko Hawai‘i.
• E ho‘ouna ‘ia mai nä leka iä mäua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei: kwong@hawaii.edu, rsolis@hawaii.edu
